2Th 2 | ASO | STEP | Leze zuho mate, isetine ve. Guvetesi ve Izesu' Kilisito' alingumukisi ido' navo ezela vo do nubo oloningumukisi loloze. Gililo.

2 Thessalonians 2

Lou' Gamazi Gele Hulaa' Ive Ma Soto' Iline' Gamazi

1 Leze zuho mate, isetine ve. Guvetesi ve Izesu' Kilisito' alingumukisi ido' navo ezela vo do nubo oloningumukisi loloze. Gililo. 2 A'mine Guvetesi ve'mi gamene nene mo ogo vave li evene' malite lani' ve. Ne'mine lani' nene soza lani' nenako lingine gili lite' li gatine gili gopo igi muludine dize dize amilo. Ee, a'mine gamazi nene O'moso'mi veleti' gamazi ve li lahe ido' mono' gamazi mati' ve li lahe ido' leli' luhuvo nite' huluninguti' ve li lahe nesi nene gatine gili gopo igi muludine dize dize amilo. 3 Soza gamazi ne'mine mana'mine igi li-lingimi di gopo i-lingidikelizaze. Nemu' ti' li gililo: A'mine Guvetesi ve'mo aline' gamene olihe olosa neivo gomu' nene evene' O'mosomu' gili huli lovo i imilizani' monovo nene buu lo soto' oloseive. Ido' lou' gamazi gele hulo avuto' ogali'mi meleho minelive nene ado' vo tolovo gehepeve ilido' minelive nene soto' oloseive. 4 A'mine ve nene soto' ogo evene' O'mosote ve lani' inite' nilizahe ido' di kekeize li ngopo'ni lilizani' inite' nilizahe ne'mine inite' mukikisi nene lovo o ngemo ngivile' ogo ei' oko'no do dizo na'nise'ne ne O'moso nouve lo O'moso'mi numungu' dizo O'moso'mi mo'mosi'velokisi mineleseive.

5 Naza lengita mino gamazi ne'mine lo lo-lengeme' lengeme' ogo minuvoni' ma gatine molahe. 6 Ido' mene gamenelo' a'mine ve'mi aka've hize tile-de neive nene gili nizave. O'moso'mo molo-dine' gamenelokovo' soto' oloseive. 7 Mene gameneu' lou' gamazi gele hulo avuto' oga' suno ne'mo suno' gono daa' neine'za aka hize tilaa' neive nene O'moso'mo do ngolo' lo-davo soto' oloseive. 8 A'mine gamenelo' nene lou' gamazi gele damaa' ive ma soto' iline' nene Guvetesi ve Izesu' vele mutive ne'mo bele heleleseive. Guvetesi ve ogo labana've do soto' ogavo ne'mo do goloso o-deleseive. 9 A'mine lou' gamazi gele damaa' ive nene Satani'mo amuzo emavo ogo hetelo apa nite' ogo ato ato' suno do ele'vole' inite' muki' nene oso' amoso' ogo soza molo do soto' oloseive. 10 Ne'mine ogo ato ato' suno goloso do evene' linge ma labuluvo ilizado' minave engi' nene go'ine izo do gopo o-ngedeleseive. A'mine ve nete gamazi gihile laminekumu' ngumo helamivo gili hulani' nenako O'moso'mo do ngu' izamoloseive. 11 Ee, ingine gamazi gihile laminekumu' ngumo helamivo minani' nenako O'moso'mo asi've lavo ga'ine gili gopo ilisave. Gili gopo ilizani' ne'mo soza gamazilo' nene mudise gili ele'vole' ilisave. 12 O'moso'mo ne'mine o-ngedeline' nene hazamu' nomive. Gamazi gihile lamine' gili dami monovo golosomu' lanite' gilaa' ave muki' nene goni' o-ngedo lihime ngemelove lo ne'mine o-ngedeleseive.

Lingine Lukuvo Nalizave Lo O'moso'mo Mo Do Kegeso Hulo-lede Neize. Monoku' Mini Gili' Li Minilo Lo Paulo' Lo-ngimine' Gamazi

13 Leze zuhokizo, Guvetesi ve'mo lulo lengeme neine' mate, O'moso'mi Sikalahu've ne'mo lutine do guluvi' lo do lisihe' ogavo gihile lamine' nene gili ele'vole' ikevo do lungu' izelove lo O'moso'mo gamene gala'muda vomine do kegese-lingidingumu' ve lo eze opo'ni lolonido' ogavo gamene gamene laa' noune. 14 Ido' Izesu' gamazi've lamine' nene lo-lengemekunivo gilikevo O'moso'mo do lungu' izelove lo lengele'mize molani' nene Guvetesi ve Izesu' Kilisito' labana've di ti' ilizave lo lengele'mize molani' ma neive. 15 Nemu' nene leze zuhokizo, veteti' gamazi lo-lingimune' nehe luhuvo nitekuti' lo-lingimune' nehe mono' gamazi apize lingimune' muki' nene amuzo mili di gili' li di minilo.

16 Asi've Guvetesi ve Izesu' Kilisito' ido' Meteho O'moso aza lulo lemo nasahili' o-ledo lute hize ele' o-ledevo' o-ledevo' ogo mino laza do lamine' ogovo' minelone lo gele ele'vole' olonido' gate do hamo' o-ledaa' ive'mo 17 lutine do gili' lo-lengedo inite' lamine' gihile muki' ilizado' nesi gamazi lamine' lilizadokisi ido' gono lamine' dalizadokisi hize ele' o-lengedelive lo nolune.